بلوچستان میں بلدیاتی الیکشن، آزادامیدواروں کا پلڑا بھاری،1058 نشستوں پر کامیاب

کوئٹہ:  بلوچستان کے 32 اضلاع میں بلدیاتی الیکشن کے نتائج آنے کا سلسلہ جاری ہے، آزاد امیدواروں نے 1058 نشستوں پر کامیابی حاصل کر لی۔

بتایا گیا ہے کہ جے یو آئی 122 نشستوں کے ساتھ دوسرے نمبر پر ہے، دیگر جماعتوں میں بی اے پی نے 77 ، بی این پی 41  اور نیشنل پارٹی 26 نشستیں حاصل کر سکی ہے۔ نون لیگ، پیپلز پارٹی، پی ٹی آئی اور دیگر جماعتوں نے بھی انتخابات میں حصہ لیا۔

گذشتہ روز پولنگ صبح 8 بجے شروع ہوئی جو بغیر کسی وقفے کے شام 5 بجے تک جاری رہی، اس موقع پر سکیورٹی کے سخت انتظامات کئے گئے تھے۔ بلوچستان میں 9 سال بعد بلدیاتی انتخابات کا انعقاد کیا گیا ، 32 اضلاع میں ووٹنگ کے دوران لڑائی جھگڑوں کے واقعات بھی پیش آئے جن میں ایک شخص جاں بحق اور 16 زخمی ہوئے۔ باقی 2 اضلاع کوئٹہ اور لسبیلہ میں انتخابات کے شیڈول کا اعلان بعد میں کیا جائے گا، صوبائی حکومت کی جانب سے حلقہ بندیوں میں اضافے کے بعد وہاں انتخابات کی حلقہ بندی جاری ہے۔