لاہور: ملک کی بگڑتی ہوئی معاشی صورتحال کے باعث ڈالر خوشحال ہو رہا ہے جبکہ روپے کا برا حال ہے، ایک مرتبہ پھر امریکی کرنسی کی قیمت میں بڑا اضافہ ریکارڈ کیا گیا۔
اوپن مارکیٹ میں امریکی ڈالر تاریخ کی بلند ترین سطح پر پہنچ گیا ہے، قدر میں 3 روپے 50 پیسے کا اضافہ دیکھا گیا اور نئی قیمت 204 روپے ہو گئی ہے۔
اوپن مارکیٹ کی طرح سٹیٹ بینک آف پاکستان کی سماجی رابطے کی ویب سائٹ ٹویٹر پر جاری کردہ اعداد و شمار کے مطابق رواں ہفتے کے مسلسل دوسرے کاروباری روز کے دوران انٹر بینک میں روپے کے مقابلے میں امریکی ڈالر کی قیمت میں دو روپے 77 پیسے کا بڑا اضافہ ریکارڈ کیا گیا۔
اعداد و شمار کے مطابق انٹر بینک میں روپے کے مقابلے میں امریکی ڈالر کی قیمت 200 روپے 6 پیسے سے بڑھ کر 202 روپے 83 پیسے ہو گئی ہے۔
دوسری طرف پاکستان سٹاک مارکیٹ میں غیر یقینی صورتحال کے باعث اُتار چڑھاؤ غالب رہا، 100 انڈیکس 8.80 پوائنٹس کی مندی کے بعد 41568.41 پوائنٹس کی سطح پر پہنچ کربند ہوا، پورے کاروباری روز کے دوران کاروبار میں 0.02 فیصد کی تنزلی ریکارڈ کی گئی۔