ٹک ٹاک کا وہ نیا اضافہ جو نوجوانوں کی زندگیوں کو بدلنے میں مددگار ہوگا

ٹک ٹاک کا استعمال بیشتر افراد تفریحی مقاصد کے لیے کرتے ہیں مگر اب یہ سوشل میڈیا نیٹ ورک نوجوانوں میں مثبت تبدیلی لانے کے لیے اہم کردار ادا کرے گا۔

یہ سوشل میڈیا پلیٹ فارم اب آپ کو تعلیمی، سائنسی اور دیگر شعبوں میں بھی مدد فراہم کرے گا۔

اس مقصد کے لیے ٹک ٹاک نے اسٹیم (سائنس، ٹیکنالوجی، انجینئرنگ اور میتھ) نامی فیڈ متعارف کرانے کا اعلان کیا ہے۔

اس فیڈ میں زیادہ سے زیادہ تعلیمی ویڈیوز موجود ہوں گی، جن سے آپ کمپیوٹر کوڈ بنانا سیکھ سکیں گے یا مختلف تجربات پر بات کر سکیں گے۔

یہ نئی فیڈ فالوونگ، فار یو اور دیگر فیڈز کے ساتھ نظر آئے گی۔

کمپنی کے مطابق اسٹیم سے متعلق ہیش ٹیگز کو اب تک 110 ارب سے زائد بار دیکھا جاچکا ہے اور اسی کو دیکھتے ہوئے یہ فیڈ متعارف کرائی جا رہی ہے۔

کمپنی نے بتایا کہ اس سے ابھرتے ہوئے سائنسدانوں میں اپنے کام پر بات کرنے کی حوصلہ افزائی ہوگی یا آپ کوئی پروگرامنگ کوڈ سیکھ سکیں گے۔

سائنسی مواد کے لیے ٹک ٹاک کی جانب سے مختلف اداروں سے شراکت داری بھی کی جائے گی، تاکہ اس میں شیئر کی جانے والی معلومات مستند ہو۔

کمپنی کو توقع ہے کہ اس طرح کی نئی فیڈز سے وہ زیادہ افراد تک رسائی حاصل کر سکے گی، خاص طور پر ایسے صارفین تک جو ابھی ٹک ٹاک کو غیر سنجیدہ تصور کرکے اس سے دور رہتے ہیں۔

خیال رہے کہ متعدد حلقوں کا ماننا ہے کہ ٹک ٹاک سے بچوں اور نوجوانوں کی تعلیم متاثر ہو رہی ہے اور اسی کو مدنظر رکھ کر اسٹیم فیڈ کو تیار کیا گیا ہے۔

یہ نئی فیڈ آنے والے ہفتوں میں ٹک ٹاک ایپ کا حصہ بنے گی۔