Official Website

خاتون نے آئیفا کی تقریب میں سلمان خان سے اظہار محبت کرکے انہیں پروپوز کردیا

37

بالی وڈ کے سپر اسٹار سلمان خان جن کی مقبولیت ناصرف بھارت اور پاکستان میں ہے بلکہ دیگر ایشیائی ممالک سمیت ہالی وڈ میں بھی ہے جس کا اندازہ حال ہی میں پیش آئے واقعہ سے بہتر طریقے سے لگایا جاسکتا ہے۔

بھارت کے سب سے بڑے ایوارڈز انٹرنیشنل انڈین فلم اکیڈمی (آئیفا) 2023 کی تقریب میں میڈیا سے گفتگو کے دوران ہالی وڈ سے آئی ایک خاتون نے سلمان خان کو شادی کے لیے پروپوز ہی کر ڈالا جس کی ویڈیو سوشل میڈیا پر خاصی وائرل ہے۔

مائیک تھامے خاتون نے سلمان سے کہا کہ ‘میں ہالی وڈ سے سیدھا آپ سے یہ سوال کرنے آئی ہوں، وہ لمحہ جب میں نے پہلی بار آپ کو دیکھا تھا، میں آپ کی محبت میں گرفتار ہوگئی تھی’۔

جواب میں سلمان خان نے فوراً کہا ‘آپ شاید شاہ رخ خان کی بات کر رہی ہیں’۔

خاتون نے کہا ‘میں سلمان خان کی بات کر رہی ہوں، کیا آپ مجھ سے شادی کریں گے’؟

جواب میں اداکار نے کہا ‘اب میری شادی کی عمر نہیں رہی، آپ کو مجھ سے 20 سال پہلے ملنا چاہیے تھا’۔

یہ خاتون کون ہیں؟

بھارتی فوٹو جرنلسٹ وائرل بھایانی کے مطابق یہ خاتون علینا خلیفا ہیں جو ہالی وڈ کی ایڈورٹائزنگ ایجنسی فیم ماسٹرکلاس کی جانب سے آئیفا کے ریڈ کارپٹ کی میزبانی کررہی تھیں۔