Official Website

ٹک ٹاک نے پاکستان میں 6 ملین سے زائد ویڈیوز حذف کردیں

47

ٹک ٹاک نے اپنی کمیونٹی گائیڈ لائنز انفورسمنٹ رپورٹ جاری کی ہے جس میں 2021 کی تیسری سہ ماہی کے دوران کمیونٹی گائیڈلائنز کی خلاف ورزی کرنے والے مواد اور اکاؤنٹس کی تفصیلات دی  گئی  ہیں۔

رپورٹ میں سخت کمیونٹی گائیڈ لائنز کی خلاف ورزی پر حذف کیے گئے مواد کے بارے میں بھی تفصیلات فراہم کی گئی ہیں جس سے پلیٹ فارم کی کمیونٹی، پالیسی سازوں اور این جی اوز کے سامنے جوابدہی کا بھی اظہار ہوتا ہے۔

دنیا بھر میں کتنی ویڈیوز حذف کی گئیں؟

کمیونٹی کے تحفظ اور پلیٹ فارم کی دیانت داری برقرار رکھنے کے غرض سے دنیا بھر میں یکم جولائی2021 سے 30ستمبر تک 91,445,802 ویڈیوز حذف کی گئیں جو اپ لوڈ کی گئی تمام ویڈیوز کا 1.0فیصد ہے۔

ٹک ٹاک کے مطابق تقریباً  95فیصد ویڈیوز کو رپورٹ کیے جانے سے قبل حذف کیا گیا جب کہ 88 فیصد ویڈیوز کو دیکھے جانے سے قبل اور 93 فیصدویڈیوزکو پوسٹ کیے جانے کے 24گھنٹوں کے اندر حذف کیا گیا۔

سال2021 کی تیسری سہ ماہی کے دوران حذف کی گئیں ویڈیوزکے اعتبار سے پاکستان چوتھے نمبر پر رہا جہاں کمیونٹی گائیڈ لائنز کی خلاف ورزی کرنے والی کل 6,019,754 ویڈیوز حذف کی گئیں۔

اس کے علاوہ  73.9فیصد ویڈیوز ہراسمنٹ پھیلانے اور دھمکی آمیز مواد کے باعث حذف کی گئیں جب کہ 72.4 ویڈیوز نفرت آمیز ویڈیوز کسی کی جانب سے رپورٹ کیے جانے سے قبل حذف کی گئیں۔

ٹک ٹاک کا کہنا ہے کہ پلیٹ فارم کی سلامتی، دستیابی اور قابل اعتماد ہونے کا تحفظ کرنے کی غرض سے ٹک ٹاک اپنی پالیسی کو وسعت دے رہا ہے جس میں پلیٹ فارم کے علاوہ ٹک ٹاک کے مواد، اکاؤنٹس، سسٹمز اور ڈیٹا تک بلا اجازت رسائی پر پابندی ہو گی جب کہ مجرمانہ سرگرمیوں کے غرض سے ٹک ٹاک کے استعمال پر بھی پابندی ہے۔